Ший лоӀамеча латарах вола вай кхоъ спортсмен белгалваьлар, СКФО Хьалхале йолаш
ГӏалгӀай республикера ший лоӀамеча латарах вола кхоъ спортсмен, Нохчий-республикан Шолжа-Гӏалий тӀа Къилбаседа Кавказа федеральни куран Хьалхале дӀахьош белгалваьлар, яхаш, дийцар «Сердало» газетага ГӏалгӀай Республикан спортивни латара Федераце зарбан болх лелабераша.
«390 гаргга 16 шу кхоачаш бола ондаргаш таро йолаш бар котало яккха. Кхетачен программанна чудоагӀаш дар 12 дозала даькъ тӀа спортсменаш яхьебахар. ВоккхагӀа волча тренера Гаьгенаькъан Рамзана кулгал деш, Гӏалгӏайчен гулъяьча тоабан таро хилар 5-гӀа моттиг яккха, иштта кхоъ тайп-тайпарча дозалах майдилгаш яьхар», - аьлар хоамо.
Тоачанаькъан Рахьима ший тоабанна котало ера, дозал 42 кг долаш. Тӏоаршхой Мухьмада шоллагӀа моттиг яьккхар, 35 кг дозал долаш. Муцолганаькъан Мухьмад-Салена борза майдилг елар, 85 кг дозал дарашца яхьеваларах. Йовлой Рахьима кӀеззига аьттув тоъаш хиланзар, коталон лагӀа тӀа вала. Из пхелагӀча моттиге хилар, 35 кг дозал долаш.
Тхога хоам баьчо яхачох, СКФО Хьалхале чӀоагӀа лоархӀаме я доакъашхошта. Цо таро лу царна Россе ондаргий Хьалхален юкъе дакъа лаца.
