«Мехкагадоаккхар» яхача теникий театра фестивале, белгала хилар вай мехкара ТЮЗ
Краснодаре дӏайихьача «Мехкагадоаккхар» яхача теникий театрий V Йийллача фестивале дакъа лоацаш хилар вай мехкара паччахьалкхен берий театр. Краснодарерча теникий театро дӏахьош йола из йоккха кхетаче, РФ Президент волча Путин Владимира кхайкадаьча Россе къамий цхьоагӏон Шера хетаяь яр. Къаман хӏама юкъелоацаш, къонабараш шоай Даьхенцара лерхӏам, ӏадаташ, истори лорадеш хилара тӏахьехаш бола болх ба ала йиш я цох.
«Вай мехкарча кхоллама тоабо цига гойтар «Цхьаккха хӏамах ма кхера, Зураб» яхача Чахкенаькъан Саӏида пьесах оттаяь спектакль. Белгалде деза, из болх массане безабенна тӏаийцалга, тӏахьожаш хиннараша а лакха мах оттабаьлга», - йоах «Сердалога» вай ТЮЗера бенача хоамо.
Яхьа программан юкъе шоллагӏа моттиг яьккхар Гӏалгӏай ТЮЗо. Цул совгӏа, Ховтанаькъан Лейлайна, Ховтанаькъан Дугурхана «Толашагӏа йола актерски дуэт» яха дипломаш а делар.
Федеральни оагӏонца дӏахьоча йоккхача яхьашка, хьинаре къахьегарах белгалбала аьттув хилар вай актёрий. Таханарча яхьашка шоллагӏча моттиге оттаро хьагойт, театре къахьегараш лакха начӏал дола говзанчаш болга. Къаман хӏама хьалхадоахаш, Даьхен театра толашагӏа дола ӏадаташ лорадеш ба ала деза царех. Краснодарерча Керттерча Росгварде оагӏон оркестро дакъа лоацаш, чакхдаьлар фестивала гӏулакх.
