«Шин энгара гӏалаш» яхача моттиге, экологически болам дӏабихьар
Гӏалгӏайчен «Шин энгара гӏалаш» яхача моттиге, дӏабихьар керда экологически болам. Къаьнарча гӏалай доазон тӏа лостам бе арабаьлар республикан культура Министерствон болхлой, моттигерча Тароний центра лоӏамхой, «Даьй ларах» яхача туристически юкъарлон доакъашхой.
«Болама доакъашхоша гӏалашта тӏабода никъ цӏенбир, цу даькъ тӏара нувхаш дӏаяьхар, йокъаенна баьцаш, кӏотаргаш дӏахьекхар. Цу тайпара кхетаченаш дӏахьош хиларо таро лу культуран тӏехьален гӏишлош лорае, гонахьара доазув лостам болаш леладе, туристически наькъаш дегӏадоаладе»,- аьлар «Сердало» газетага Гӏалгӏайчен Паччахьалкхене.
«Шин энгара гӏалаш» яха моттиг (таржам дича «Башни двух жён») тамашийна гӏишлош я, Гӏалгӏайчен лоаман Кхерахье латтача дукъ тӏа гӏалай кепара хьалъяьй уж.
Уж яьй бӏаьшерен юкъерча ханашка, Озди-чӏож, Ах-чӏож оалача шин чӏожен юкъе. Из сийленг бӏаьшераш доахаш лаьттад тӏахьожама, лорабалара декхар кхоачашдеш, Вӏовнушкера Тӏаргиме кхаччалца дола доазув цигара дика бӏаргагуш а хиннад.
Исторически мах лакха хиларах, из моттиг Цаӏ йолча паччахьалкхен реестра чуйоагӏаш я, иштта паччахьалкхено чӏоагӏа лораеш лелаерех а я.
