Эккажкъонгий-Юртарча ахархой класса дешархой цхьаццадараш балхаца чӏоагӏдеш ба
Эккажкъонгий-Юртарча №5 йолча ишколерча ахархой класса дешархой лекцешкара балхага баьлар. Бӏаьстан хана шоаш дӏайийнна коартол чуэцаш боахк уж тахан. Кхоана ахархой хинна дӏаотта безача къонабарашта, чӏоагӏа лоархӏам болаш дар ишкола доазон тӏа шоаш къахьийгачох хьахиннар тахан бӏаргагор.
«Дӏадахача шера дӏадоладир из беркате гӏулакх. Мехкарча ишколашка ахархой классаш хилар боккха пайда беш хургда. 2025-ча шера тов бетта 1-ча дийнахьа денз, мехкарча пхе ишколе шоай болх дӏаболабир цу классаша. Укх шера кхы а ворхӏ класс хьаелла лерхӏ, цу юкъе я Эккажкъонгий-Юртара №5 йола ишкол а», - дийцар «Сердалога» дешареи ӏилмани гӏулакхех йолча Министерстве.
Мехкарча юртбоахама гӏулакхех йолча Министерствон дешара гӏулакхех болча оагӏонца цхьана бувзам лоаттабеш, дӏахьоча балхах хьадаьржа дика да ала йиш я цох. «Ахархой оагӏонцара низ» яхача федеральни проектага гӏолла, дӏахьош болх ба из, кхачанцарча кхерамзлен хӏама технологически оагӏонца лертӏа хилийтарах йолча къаман проектанна чудолхаш хувцамаш да уж.
Цу гӏулакха керттера декхар – тахан вай экономикаца лоархӏамедараш керте оттадеш, лакха говзал йола ахархой кхебар.
