Мах бу моттигаш дӏаяхар тӏадожадаьд мехкарча УФАСо Магӏалбикерча хьакимашта
Магӏалбик-Шахьара паркера цхьацца хӏама йохкаш йола моттигаш дӏаяха, аьнна, тӏадиллад УФАСо цигарча хьакимашта. Из хоам «Сердалога» бир цу моттига зарбан болх лелабераша.
Цигарча хӏама йохкаш долча чаьтарий, тикилгий гӏулакхех йолча муниципальни акта массехк оагӏонга хьежа, оттаяьча чӏоагӏон ха моццагӏе чакхъяьннилга теркаме лаьца, бокъоно дӏабеха болх дӏабахьа безаш хилар УФАС. Массехк кхоачамбоацар зийра цо, каьхаташка хьожаш. Ма дарра аьлча, дӏадахача шерарча оагӏой бетта ха чакхъяьннача каьхаташка гӏолла болх дӏахьош бар уж. Белгалде деза, цу оагӏонца дувзаденнараш боаггӏача боараме хилийтара тӏехьа гурахьа чӏоагӏо оттаяьлга, бакъда лелаеча моттигех дола ахча укх шера а хьаийдеш хиннад. Цо хьагойт муниципальни лаьтта бизнес бокъо йоацаш йоаржаяь хиннилга, кхыбола бизнесменаш шоай гӏулакх дӏадоладе аукционашка хьежаш болча хана.
УФАСа болхлоша къаьстта йоккха терко йир лаьттан доазув къоастадаь доацаш киоскаш, тикилгаш ӏоувттаярах долча муниципальни каьхаташта. Цига оттадаьчох, моттигера цхьацца хӏама хьадераш (маькх ераш, фермераш, иштта кхыбараш) тикилгаш ӏоувттае йиш йолаш хиннаб, цу оагӏонцара болх дӏа ца хьош. Тохкамо хьагойтар, ший маькх йохка аьнна къоастаяьча моттиге пекарне телефонаш, барзкъаш е кхыйола хӏамаш йохкаш хиннилга. Иштта латт маьчеш тоаеш йолча чаьтарашцара гӏулакх а. Каьхаташка гӏолла цхьацца балхаш деш йола пхьоалле санна цига хьаелла йиш йолаш хиннаб уж офис, кафе, хиш дохка тикилг, иштта кхыйола моттиг а.
УФАСа болхлоша Магӏалбикерча мэрена тӏадиллар, ма хулла сихагӏа цу оагӏонца дувзаденна кхоачамбоацараш меттадоаладе, аьнна. Ишттача киоскашка моттигерча хӏама хьадераша шоаш арахецаш бола кхоачам мара бохка йиш йоацилга теркаме лаьцар цига.
