Сага бокъонех волча викала хьаллаьцар набахта воаллар
Гӏалгӏайчен сага бокъонех волча викалга кхайкарал дир ӏӏӏ тоабан заӏапхочо, набахта воаллача сага дас. Цо ший халача вахарах бола бала бийцар. Цун воӏ лаьца воалл Владимирски областе гӏолла йолча Россе УФСИН тохкама изоляторе, кастлуш из дӏахьожавеш ва кхыча набахта. Да латкъаш ва; пенси мара хьатӏабоагӏаш кхы пайда а боацаш, шийна цу гаьнарча мехка тӏехьааха могаргдац, яхаш.
«Из гӏулакх дайзачул тӏехьагӏа, сага бокъонех волча викала Россе ха теха лаьца боахкарий Федеральни гӏулакхе лаьрххӏа дола каьхат дахьийтар; халача вахара хьалаш хилар а, да могашал яйна хилар а дӏалоархӏаш, цун воӏ гаьнацаваккхар дехаш.
Из хаттар дика тӏаийцар. Из саг Нохчий Республике гӏолла йолча Россе УФСИН тоавалара моттиге дӏавохийтаргва», - аьлар «Сердало» газетага ГӏР УПЧ хоамий-аналитически балха даькъ тӏа.
Из дехар кхоачашдар дувзаденна да, цкъа-дале, Нохчий Республика юхегӏа хиларца, цунца цхьана даьна а аттагӏа хургда, зе де а дезаргдац, ший воӏа тӏехьаводаш. Цул совгӏа лаьца воаллачоа а психологически ше хьаллоацаш хиларах дикагӏа да, из сихагӏа меттавара, дикача оагӏорахьа хувцавалара.
Гӏалгӏайчен сага бокъонех волча викала къахьегарах, шин оагӏорахьара пайда болаш из гӏулакх кхоачашде таро хилар, законо дӏадехар а лоархӏаш.
