Бакъдунен чу дӏавахар, Гӏалгӏайчен парламента хьалхара председатель хинна Келиганаькъан Мурат
Гӏалгӏайченга доккха во дера. Укх дунен тӏара дӏавахар дика политически, ӏилман, юкъарлон болхло, Гӏалгӏайчен паччахьалкхе хьакхоллаш доккха дакъа лаьца вола Келиганаькъан Ювсапа Мурат.
Келиганаькъан Мурат керте лаьттар таханара Гӏалгӏайче хьакхоллаш. Халкъа Гуллама хьалхара председатель волаш цо ше гойтар дукха хӏама ховш вола политик, ший Даьхе езаш вола саг санна. Цун хьаькъал, паччахьалкхен уйла е ховш хилар накъадаьлар исторически хувцамаш долча хана - Келиганаькъан Мурат вар Гӏалгӏай Республикан Конституце керттерча авторех цаӏ.
Политически болх лелабарал совгӏа, Ювсапа Мурата кӏоаргга лар йитар Даьхен ӏилман наькъ тӏа, цо дукха шераш хетадир лакхарча дешара. Цун академически къахьегам, тохкама болх, хьехархочун начӏал накъадаьлар дийша къона бӏарчча ноахал хьалкхедеча, уж тахан а къахьегаш ба шоай республикан, мехка хьашташ кхоачашдеш.
Гӏалгӏайчен кулгалхочо Келаматанаькъан Махьмуд-Ӏаьлас дег чура кодам бийцар цун гаргарча нахага, балха новкъосташка. Цо аьлар, иштта вола къаман воӏ вайна юкъера дӏавахар дерригача къаманга дена во да.
Келиганаькъан Ювсапа Мурата вахара никъ цӏена, сийрда бар, ший Даьхе, къам дезаш саг вар из. Гӏалгӏайчен сий дола воӏ даим вахаргва цун мехкахой дегашка.
Дала гешт долда цун, Дала къахетам болба.
