2025-ча шера хӏетта малхадаьннача берашта 7 819 СНИЛС оттайир мехкарча СФР

Берий даьша, ноаноша дехар чудала ца дезаш, дӏабихьар из болх. Вайна ма харра, СНИЛС бер малхадалар чӏоагӏдича хьалуш, цо мел йоаккхача хана кхы хувцалуш яц. Цох дар довза йиш Госуслуги яхача оагӏонга гӏолла бера наьна доалахьарча кабинете, ЗАГСо цу балхаца дувзаденнараш мехкарча СФР дӏакхачийтачул тӏехьагӏа.

Цу оагӏонцарча болхлоша яхачох, тайп-тайпарча, паччахьалкхен лоархӏаш долча гулакхашца дувзаденнараш хьаделлаш да из каьхат. Цу юкъе чудодаш да бер дарах нанна луш дола ахча, вахара оагӏонцара пособеш, ОМС полисаш, иштта дарбанченцара бувзам. Цул совгӏа, СНИЛС эшаш я балха оттача хана, пенсецарча бокъонашца.

«Нагахьа да, нана Госуслуги яхача портале дӏачӏоагӏбенна беце, СФР моттигерча оагӏонга гӏолла, бер дарах тешал деш долча каьхатаца МФЦ гӏонца хьаэца йиш я СНИЛС. Цунцара номер а цу дийнахьа хьалуш я»,- белгалдир вай мехкарча СФР оагӏон кулгал деш волча Йовлой Зубейрас.