Гӏалгӏайче 2027 шера хьалъе йолаергья шиъ спортивни гӏишло
Гӏалгӏай мехка 2027 шера хьалъе йолаергья Илдарха-Гӏалий тӏара, иштта Дабе-Юртара ФОКаш, яхаш, дийцар ГӀР Кулгалхочун зарбан болх лелабераша.
«Аз тӏадиллача декхарах, республикера хержа волча сенатора Илезанаькъан Михаила кхетаче хилар Россе спорта Министра гӏончаца Мгер Гандилянаца. Хоадам болаш из хаттар къоастадаьд. Иштта могадаьд модульни спортивни залаш, бассейнаш хьалъяр. Уж объекташ цу юрта бахача наха меттел, гонахьарча доазон тӏа бахарашта а накъайоалаш хургья.
Цхьаькха, Наьсарен шахьара лаьрххӏа спортивни гӏишло хьалъе лерхӏаш я федеральни проектах.Кхы а йиъ комплекс хьалъяра хаттар да чӏоагӏде дезаш», - аьлар Келаматанаькъан Махьмуд-ӏаьлас, мехка таханарча заман спортивни хьал дегӏадоаладара.
Макшарипа Махьмуд-ӏаьлас белгалдир, Гӏалгӏайчера хержача федеральни ӏаьдалца болх беш болча сенатораша дикагӏа къахьега деза, республикан хьал тоадара дола хаттараш кхоачашдеш. Цар керттера декхар да республикан бахархой вахара хьалаш тодара дола хаттараш кхоачашдара дукхагӏа къахьегар. Цу тайпара хьалъе таро хургья керда спортивни комплексаш, залаш, бассейнаш, тӏехьа тӏадоагӏача ноахала дика хьалаш хьакхоллаш. Къаьстта наьха вахара хьалаш тоадеш бола болх дӀабахьар нийсда да, аьнна, лоархӀ ГӀР Кулгалхочо.
