Дӏадахача шерашкара болх чакхбаланза йолча гӏишлой мах 28 млрд сомага кхоачаш ба
Дӏадахача шерашка кийча хила езаш хиннача, болх чакхбаланза йолча гӏишлой мах 28 млрд сома тӏа соцаш ба тахан. Цох лаьца дийцар вай мехкадас Келаматанаькъан Махьмуд-ӏаьлас кулгал деш, Паччахьалкхено дӏайихьача кхетаче. Республикан экономикан новкъарле еш да гӏишлош болх бӏаьхбенна латташ хилар.
«Укх тӏехьарча шерашка Гӏалгӏайчен хӏама дикка хувцаденнад. Мехкарча массайолча моттигашка хьалъеш латт керда ишколаш, берий бешамаш, дарбанчеш, спорта моттигаш, кхыйола лоархӏаме гӏишлош, иштта тоадеш латт наькъаш. Россе Президента, Паччахьалкхено дикка гӏо деш хиларца вӏаштӏехьдоалаш хӏама да из. Цунга хьежжа, гӏишлон балхаш боаггӏача боараме дӏахьош хила деза, цхьаккха кхоачамбоацараш хургдоацаш, массадола хӏама теркалдеш дӏаяхьа еза цу оагӏонцара проекташ.
Мехка рузкъах хьалъеш йола моллагӏа йола гӏишло, юххьанца къоастаяьча хана кийча йолаш, бахархошта паргӏато хургйолча оагӏонца болх дӏахьош хила еза. Дӏадахача шерашка нийсденна гӏалаташ, кхоачамбоацараш тахан а ӏоткъам беш да вайна. Болх чакхбаьнначул тӏехьагӏа дӏахо кхы а тоае езаш, харцахьа даьраш юха меттадоаладе, нийсде дезаш гӏишлош хилар мехка. Из мо хӏама цхьаккха тайпара нийсдалийта йиш йолаш дац! Болх чакхбаланза, кхы а меттайоалае еза гӏишлош яхар вай республике чакхдалийта йиш йолаш дац. Программаца къоастаяь, эшаш мел дола ахча дӏаденна латтача гӏишлон болх юххьанца йиллача хана, боаггӏача боараме чакхбаьккха хила безаш ба. Нагахьа кхоачамбоацараш нийсденнадале, уж юстардахарал совгӏа, малагӏча бахьанашца уж нийсденнад тахка деза, цу тайпара хӏама кхы нийслургдоацаш», - язду вай Мехкадаc ший Телеграм-оагӏон тӏа.
Моллагӏа йолча гӏишлон тӏехьа мехкара адам латт, наха эшаш я уж моттигаш. Ураотташ латта къона тӏехье я вай ювцар... Ишколаш, берий бешамаш хьаелларга хьежаш; таханарча заманга хьежжа тоаяь йолча дарбанчен тхов кӏалха дегӏа могашал меттаоттаярга сатувсаш ба нах; дика, кхераме доаца наькъаш хилар, ЖКХ оагӏонца деррига дика хилар деза мехкахошта. Цу дерригнена тӏатайжа, мехка тоаеш мел латтача моттигашта лакха тӏахьожам беш, болх малагӏча боараме дӏахьош ба тохкаш хила, аьнна, тӏадиллар вай Мехкадас Паччахьалкхенна. Дӏабохийташ бола кхоачам малагӏча тайпара ба, тоаяь яьннача моттигий хьал миштад, иштта ганзера хӏара сом малагӏча гӏулакхашта дӏадохийташ да тохкаш хила безилга белгалдир Мехкадас.
Республикан кулгалхочо хьалхадаьккхар, деррига чакхдалара болх хозагӏа болча тайпара оттабаь духьалба ца а гӏерташ, дуккхача шерашка наха паргӏато еш, тӏехдика тоаяь, цхьаккха гӏалатло йоаца моттигаш хургйолаш бе беза. Из да тахан теркалде дезар!
