Наркоманена духьала къовсам лоаттабарах, дийцар Магӏалбикерча администраце
Магӏалбикерча администраце дӏайихьар, наркомани яхача доккхача зулама духьале лоаттаеча кхела кхетаче. Цига дакъа лоацаш бар мэре, МВД болхлой, дийша нах, иштта кхыбараш а. Къаьстта йоккха терко еш дийцар цига кагирхошца тахан лоаттабе безача балхах.
«Гулбеннараша белгалдир из гӏулакх ца даржийтара тӏехьа, цох хьокхабеннарашта дарба деш боккха болх лоаттабе безилга. Къаьстта чӏоагӏа лорабе беза хӏетта кхийнараш, республике ма хулла дукхагӏа кагирхой юкъелоацаш йола спорта кхетаченаш дӏакхахьа еза», - дийцар «Сердалога» цу моттигера.
Наркомани яхар тахан вай, дерригаш ураэтта, духьале е еза во да! Берашта, кагирхошта юкъера цу бӏехача гӏулакха лар хоадае хьожаш къахьега деза вай. Вай дерригаш цхьана цу зулама духьала къовсам лоаттабеш хуле, цу оагӏонцарча болхлошта аттагӏа хургда мехкара хьал тоаде, из зулам доаржадераш гучабаха. Тахан хьакимаша, полице, дийшача наха, бахархоша, хӏара дезало цхьана духьале лоаттае езаш дола во да из!
