Магӏалбика кхален администраце АТК баьча балхах дийцар
Магӏалбика кхале терроризма духьале яра комиссе аргӏанара кхетаче дӏайихьар администраце кулгалхочо Къоастой ӏаддал-Хьамида. Дувцаш хинна керттера дешаш дар дӏадодача шера хьалхашка лаьтта декхараш, кхоачашде карагӏдаьннар, иштта дӏахо де дезар. Къамашта юкъера гӏулакхаш чӏоагӏдара йола программа кхоачашъярах дийцар администраце кулгалхочун гӏончас Мержой Исраила; иштта цига къамаьл дир, терроризма духьала къовсам лоаттабара даькъ тӏа баьча балхах дувцаш, АТК даькъа кулгалхочо Джамболатанаькъан Мухьмада.
«Кхетаче дӏахьош дийцар хьатӏадоагӏача кердача шера цӏай дӏахьош, иштта салоӏама денош долаш кхерамзлен ӏалашо е езарах. Россе ОМВД «Малгобекский» кулгалхочун декхараш кхоачашдеш волча Фаьрганаькъан Абабукара белгалдир, кердача шерара, рождество оала цӏайш дездеча деношка дӏахьоргболча балха план оттаяь хиларах, дукха нах гулбеннача моттигашка лостам хургболаш балха тоабаш вӏашагӏйохкарах. Цул совгӏа, чурча гӏулакхий моттигашка дӏаязбаь латтача нахаца профилактически болх дӏабихьаб уж бахача», - аьлар «Сердало» газетага Магӏалбика администраце.
Юххера а, терроризма духьале яра болх дӏахьоча комиссе балхах дувцаш белгалдир, кхален вахара-политически хьал дика хилар. Кхетачен доакъашхоша чӏоагӏйир 2026 шера АТК балха план, цунна чуйоагӏа керттера кхо моттиг - къамашта юкъера барт чӏоагӏбар, экстремизма духьала къахьегар, кхерамзлен ӏалашо яр.
