Оалкамарча дешархошца дӏайихьар «Тха болх кхераме а хала а ба» яха кхетаче
Оалакамерча культуран Цӏагӏа дӏайихьар «Тха болх кхераме а хала а ба» яха кхетаче. Юртарча кхоалагӏча классера бераш дар цига гулденнараш. Россе МВД болхлой Ден хетаяь кхетаче яр вӏашагӏъеллар. Полице къахьегаш волча сага болх мел бехктокхаме, хала ба берашта дӏахайташ гӏулакх дар из.
Ловзара хьисапе цу балхаца дувзаденнараш берашта довзийта хьежар кхетачен хьалхалаьттараш.
Дешархошта хьалхадаьккхар, полицейски волча сага тӏалаттараш лоархӏаме, доккхий гӏулакхаш долга, дукхача адама паргӏато, маьрша вахар лорадара тӏехьа уж ди, бийса ца къоастадеш уралаттилга.
Кхетаче йистейоалача хана, полице болхлочун халхар деш, болам дӏабихьар бераша. Культуран Цӏенна кулгал деча Горбакханаькъан Мадинас берашта хьалхадаьккхар наькъашкара бокъонаш лораеш, полице болхлоша дӏахьош долча декхарашта лерхӏам болаш хила безилга.
