Чамалха хьалъяь яьлар хьалхара лорий гӏо дара моттиг
Шолжа кхале лоаман кӏалха уллача Чамалха, из юрт ӏойиллача денз, хьалхара фельдшерско-акушерски фусам хьалъяь яьлар. Из хӏанз ма ярра кийча я, Гӏалгӏайчен гӏишлошъяра Министерствос из лаьрххӏа балха юкъеяккхара эшаш мел дар кхоачашдеш латт.
Хьалха цу юрта шоай лорий моттиг хиннаяц. 500 совгӏа вахархо лоалахарча юрташкарча лорий гӏо дара йолча моттигашка аха везаш хулар.
Керда ФАП хьалъяьй «Дӏаьха, дика вахар» яхача проекта чуйоагӏаш. Контракта мах ба 17 млн сом. Болх дӏахьош хиннар я «Диабаза» ООО.
Из болх дӏаболабеш, Гӏалгӏайчен кулгалхочо Келаматанаькъан Махьмуд-Ӏаьлас белгалдир, из бахархошта лоархӏаме хилар.
«Керда лорий моттиг доккха совгӏат хургда, лоаман юрта бахача наха. Дукхача шерашка цу юрта баха нах, лорий новкъостал эшаш хилча, кхыча юрташка е кхы а гаьнагӏа ядача шахьарашка баха безаш хулар. Хӏанз шоай укх замо дӏадеххача тайпара хьалаш чудола ФАП я. Цига, гаьна баха ца безаш, хьалхара лорий новкъостал де йиш йолаш ба уж», - аьлар Келаматанаькъан Махьмуд-Ӏаьлас.
Из проект кхоачашъяра цхьацца дола хаттараш юкъедаьлар, гӏишло хьалъяра халонаш нийслуш яр. Из дӏахо кхоачашъе таро хилар, Гӏалгӏайчен гӏишлошъяра министр волча Иленаькъан Мусас из хаттар ший теркама юкъеийцачул тӏехьагӏа.
Гӏишло еча майдан тӏа тӏахьожама болх чӏоагӏбир, из хьалъерашта хьалхашка декхар оттадир болх сихагӏа чакхбаккхарца дувзаденна. Цу тайпара из гӏишло еррига а хьалъяь яьккхар.
«Из болх, кхы дӏахо ца бодаш, латташ бар, тхо доладелар тхоай кулгашца къахьега. Гӏишлонга хьожар хӏара дийнахьа. Тахан еррига халонаш тӏехьа я, гӏишло 100% кийча я. Кастлуш Чамалхара бахархой лорий новкъостал дӏакхоачаш хургба, укх заман дикагӏа дола хьалаш а цу чу долаш», - аьлар мехка гӏишлошъяра министра Иленаькъан Мусас.
Юртарча бахархой таро хургья, шоаш бахачара дӀа-юха баха ца безаш, дарба де.
