Наркотикашта духьала къовсам лоаттабарах, дийцар кагирхошца ЦТКиКИ
Наркоманена, наркобизнеса духьале лоаттаеча Халкъашта юкъерча Денна хетаяь кхетаче дӏахьош бар театра, кинон, кердадарий гӏулакхех йолча моттиге. Цига гулбеннабар цу доккхача зулама духьала болх лоаттабераш, къонабараш. «ЦТКиКИ кулгалдеш йола Дзортанаькъан Мадина, «Шанс» яхача цу бӏехача гӏулакхо толхабаьрашта дарба деш йолча моттига кулгалхо, психолог Чопанаькъан Берс вар цига дакъа лоацаш.
Наркотикаша вахар толхадаьча, хӏалакдаьча нахах яьккха видеоролик гойтар къонабарашта. Къаьстта терко еш дийцар цига, цу бӏехача гӏулакхага вугача бахьанех. Чопанаькъан Берсага моллагӏа хӏама хатта, тахка аьттув бар къонабарий. Тахан «Шанс» яхача моттиге уж нах меттабоалабе гӏерташ шоаш дӏахьоча балхах, эггара чӏоагӏагӏа лоравала, фийла хила везарех дийцар цо», - йоах «Сердалога» цу моттигера кхаьчача хоамо.
Кхетаче дӏахойихьар концертаца. Цига бар артисташ Эккажанаькъан Роза, Ӏарпенаькъан Хьава, Оздой Лейла.
