Россе байракха Ди дездеш, мах боацаш экскурсеш е бех мехкахой ИЗО музее
Россе Паччахьалкхен байракха Ди дездар хьаллоацаш, мах боацаш бахархошца экскурсеш дӏаяхьа кийча ба тахан мехкарча ИЗО музея болхлой. «Берригача дезалца музее» яха болам хьаллоацаш ба цига. Массанена йийлла хургья музея наӏараш цу дийнахьа. Боккхача мехка, ший Даьхен истори довза аьттув ба бахархой цу дийнахьа, шоай дезалашца арабаьнна. Российски триколораца дувзаденнараш довзийташ болх дӏахьоргба экскурсоведаша.
«Кхаь гойтамца хоттам бола экскурсе программа я музее бахархошта кийчъяьр. «Современники СССР» яхача оагӏоно советски ханашка хиннача говзанчий кхоллам бовзийтаргба цига. «Дошо пхи седкъа» яхача гойтаме РФ турпалий – тӏема операцена юкъе дакъа лоацаш тӏема аренашка лелача вай мехкахой исторех, цар деналах, майралах дувцаргда»; хӏаьта «Гӏалгӏайче» яхача йоккхача проекто вай къамо тхьовра денз хьабенача наькъах, кура бовхьаш долча гӏалай исторех, цу ханашка баьхарий ӏадатех, оамалех, гӏулакхех дувцаргда», - йоах «Сердалога» ИЗО музеера бенача хоамо.
Берашца арабаьнна, музее гӏолла гобоаккхаш ха дӏаяхьар массанена пайда хулаш гӏулакх да. Из цӏай теркалде ловрашка, хьежаш ба музее. Цу боламга гӏолла паргӏатта дӏачуваха йиш йолаш ва моллагӏа саг.
