Долакха-Юрта белгалдир Дунен халкъашта юкъера берий книжка ди
Долакха-Юртарча культуран ЦӀагӀа, берашта лаьрхӀа самукъадоаккхаш йола программа дӀайихьар. Из хетаяь яр Дунен халкъашта юкъерча берий книжка денна. Цун доакъашхой хилар моттигерча библиотека болхлой, дешархой, цар хьехархой.
«Цу кхетачен чудоагӀаш, берашта довзийтар йоазонхой кхоллама балхаш. Уж бар шоай начӀал эггара зӀамагӀа болча бахархошта хетадаьраш. Цига хозаш яр ГӀалгӀайчен деша говзанчий цӀераш, цар книжкаш тӀара Ӏомалу наьна мотт бувца, беза. Царех ва Коазой Нурдин, Ӏоахилганаькъан Зарета, Евкуранаькъан Лида, Гӏазданаькъан Аьсет, Новразанаькъан Макка. Цар кхоллам - из халкъа культура йовзара, хьамасара наьна мотт, къаман мах бола истори довзара дола дӀоагӀа да»,- аьлар «Сердало» газетага кхетаче дӀахьош хиннача Долакха-Юртарча культуран Цӏен исбахьален кулгалхочо Манкенаькъан Зинас.
Коазой Нурдина книжкаш тӀа сомадоал къаьнара халкъа дувцараш. Цун турпалхой чакхбоал царга гӀолла, къонача книжка дешархошта, водар, дикадар, цӀенадар, деналедар довзийташ.
Евкуранаькъан Лидай, Гӏазданаькъан Аьсета, Новразанаькъан Маккий кхолламаша бераш Ӏомаду даьй Ӏадаташ лархӀа. Цар берашта новкъостал ду шоай къамах доаккхал де. Ӏоахилганаькъан Заретай байташ я йӀовхал луш хӀара бера.
