Наьсарен ДХШ герга истол хилар тӏема-патриотически кхетам баларах
Наьсарен-Шахьара Берий исбахьален ишколе зӏамагӏчар ноахалца къамаьл хилар. Цу дешара моттиге дӏадихьа герга истол хетадаь дар тӏема–патриотически кхетам балара, цига гулбелар юкъарлон вахарах дог лазаш бараш: ӏаьдала викалаш, хьинаре юкъарлон болхлой, искусствон говзанчаш. Къамаьла юкъе дакъа лоацаш хилар Наьсарен-Шахьара Кхела кулгалхо Бохтаранаькъан Ю., республикан Халкъа Гуллама депутат Дарсиганаькъан М., иштта Наьсарен депутатий корпус.
«Тха ишкола патриотически кхетам балар духхьал дешаш хинна ӏац, из кхоллама цхьа дакъа да. Оаха ӏомаду бераш вай хьамсарча мехка хозал, цун истори, турпалхой цӏераш йовза. Таханара нахацара къамаьл лоархӏаме дар тха берашта. Искусствога гӏолла цу хозала чам чуболлийта беза берашта», - аьлар «Сердало» газетага ДХШ кулгалхочо Мержой Лидифас.
Из къамаьл дӏахьош, иштта белгалдир берий Даьхенцара безам совбоаккхаш йолча кхетам балара оагӏонна а терко е езилга. Цига гӏолла мара цар кхетабергбац Даьхенцара безам, ший мехка хьалхашкара бехктокхам. Иштта боккхий мел хул, кердача кхоллама наькъ тӏа боалаш, бехктокхаме болаш дӏагӏоргба уж.
