Вахар хаьдача СВО доакъашхой оагӏув хьаллоацаш хилар, Эккажкъонгий-Юртарча культуран Цӏагӏа
Бӏарахой Мадинас кулгал деча Эккажкъонгий-Юртарча культуран Цӏагӏа дайихьар «Цаӏ йолча Россе кхалнаьха болам» яхача федеральни партийни проекта кхетаче. Цига дакъа лоацаш бар тӏема аренашка вахар хаьдача бухой деналах бизза бола ноаной. Шоай къонгаша гойтача майралах, яхь йолаш чакхбаларах дийцар царга.
«Даьхен хӏама лорадеш лаьттарашта, цар ноаношта хетаяьча кхетаче белгалдир, цу наха тахан вай мехка моттиг хьаллоацаш кхоачшдаьраш хам баь варгвоацаш долга. Ший воӏах лаьца къамаьл де, шийна хетар кхычарца декъа аьттув бар хӏара наьна. Даьхен сийдола къонгаш кхебаьрашта хетаяь байташ ешаш, иллеш оалаш дӏаяхар из кхетаче.
Тема аренашка вахар хаьдача къаман къонгий цӏераш вай дегашка массахана яхаргья, цар дӏабихьа никъ бицлургбац мехка», - дийцар «Сердалога» мехкарча къаман кхоллама Цӏен исбахьален кулгалхочо Абдурзаканаькъан Аьсета. Бухой ноаношка хьажар, царна массахана терко лоаттаяр лоархамеча декхарех да тахан.
«Цаӏ йолча Россе кхалнаьха болам» яхача проекто хьагойтар, Даьхен хӏама хьаллацара тӏехьа болча ноаношца бувзам лелабеш, цар оагӏув хьаллоацаш болх лоаттабергболга.
