ӏоахилганаькъан Заретай аргӏанара роман кхаьчар къаман библиотеке
«Коварство судьбы» яха керда роман арадаьлар ӏоахилганаькъан Заретай дӏадахача шера Москве. Шолжа-Шахьарерча къаман библиотекан ганзе хӏанз из бархӏлагӏа книжка кхаьчад Заретай. Цу гӏулакхо хьагойт из лакха начӏал дола, хьинаре йоазонхо йолга. Тайп-тайпарча цу оагӏонцарча яхьашка белгалъяь саг я Зарета.
«1970-ча, 1980-ча шерашкара вахар довзийташ, яздаьд из книжка. Пригородни кхале я цу тӏа ювцар. Дӏаяхача ханацарча къонабарий денош, цу ханарча боккхийбараша токхаш хинна халонаш йовзийта хьежай йоазонхо вайна. Гӏалгӏай къаман дезала юкъера ӏадаташ, оамалаш, лоархӏамедараш, цар вахарера хӏара денцара гӏулакхаш мишта лаьттад вайна гойташ я из книжкага гӏолла», - дийцар «Сердалога» Къаман библиотека болхлоша.
Коазой И.А. шийна хетар юкъеоттадаь да роман. Исбахьален болх хиларал совгӏа, культуран оагӏонцара лоархӏаме болх ба ала йиш я цох. 1970-ча, 1980-ча шерашкара хӏамаш ший турпалашка гӏолла цо хиннача тайпара белгалделга теркалдеш ва вай къаман воккха йоазонхо, лоархӏаме саг вола Коазой ӏийса.
