Заьзганаькъан цӏерах болча Гӏаьзе-Коарча урама хьал меттадоаладеш боахк болхлой
26.06.2026 11:11
Гӏаьзе-Коарча Заьзганаькъан цӏерах болча урама куц тоаде арабаьннаб болхлой. Из хоам «Сердалога» бир мехкарча паччахьалкхено. «1 км кхоачаш ба тоабе беза никъ. Ишкола, иштта кхыйолча лоархӏамеча моттигашта тӏабодаш бола никъ ба из, цунга хьежжа ма хулла сихагӏа меттабоалабе безаш ба.
Шахьара моттигаш тоаярах йолча федеральни программага гӏолла, вахарерча лоархӏамедарех йолча къаман проектага гӏолла дӏахьош хиннача яхьашка эггара хьалхарча оагӏонца тоае езарех я, аьнна, бахархоша шоаш хьахержа моттиг я из.
Кӏалха жагӏа тесса, асфальт ӏобулларгболаш кӏийле шаьръеш, нийсъеш боахк цига тахан. Никъ тоабарал совгӏа, лампаш егӏа, гӏандаш, нувхашта лаьрхӏа яьшкаш оттаяь, хувцамаш де лерхӏ урам тӏа», - йоах тхога кхаьчача хоамо.
