«Кавказа Кубок- 2026» яхача болама говрбаьреш тӏаэцаш хилар лоаме
«Кавказа Кубок - 2026» яхача исторически лоархӏам болча болама доакъашхой бола говрбаьреш тӏаэцаш хилар вай лоаме. Бахархоша, «Акха дивизи» яхача гӏалгӏай говрий спорта клуба доакъашхоша, чӏоагӏа раьза болаш, къаман беркате ӏадат дӏахьокхаш, тӏаийцар хьаьший, хозача лоаман юрта.
Ӏаьржачафордагара Каспийски фордага кхоачаш, Сочи-Дербент яхача наькъ тӏагӏолла хиннад цар хьакхачар. Спорта-культуран оагӏонца лоархӏаме дола из гӏулакх Россе къамий цхьоагӏон Шера хетадаь дар. Къарший-Черсий физически культуран, спорта гӏулакхех йола Министерство я цу гӏулакха хьалхаэттар. Хьийдда доагӏача хишта, орашта, лоаман халача моттигашка гӏолла дехьабувлаш, хьабенаб цар 1500 километрага кхоачаш бола никъ. Гӏалгӏайчен хозача, беркатеча моттигех бӏаргтохаш, хьакхаьчаб баьреш.
Цӏихезача гӏалай юрта салаӏа сайцаб уж. Эггара лоархӏаме бола хьаьший баь тӏаийцар уж цига. Вай къаман тайп-тайпарча даарех дизза дола истолаш кийчдир царна. «Акхача дивизен» доакъашхоша оагӏув хьаллаьцар цар. Цхьа кӏеззига салеӏачул тӏехьагӏа, лоалахарча Нохчий мехкагахьа болалургба говрбаьреш. Россе эггара къаьнагӏа йолча шахьаре – Дербенте хургда цар совцар.
Мехка къулбехьерча моттигашкара 60 совгӏа лакха говзал йола баьри ва цу юкъе. Кавказера къамаш массахана шоайла барт, безам болаш, вошал лорадеш хиннилга белгалдеш проект я цар дакъа лоацар.
