Гӏалгӏайчен лоаман даькъ тӏа дӏаболабелар ловзараш дола парк хьалъе
Жӏайрахьа кхален (Горбани) Кхацӏатӏе индустриальни парк хьалъяра дола балхаш дӏадоладелар. Из республикан промышленность дегӏайоалаяра лоархӏаме дакъа да, яхаш, дийцар «Сердало» газетага ГӏР Кулгалхочун зарбан болх лелабераша.
«Парк я 10,3 гектара тӏа, хӏаьта проект чакхйоаккхаш я, «Промышленность дегӏайоалаяра» программа кхоачашъеш. Къаьстта йола терко тӏайохийт гӏишло хьалъеш деш дола балхаш дикал йолаш хилийтара. Цу даькъ тӏа доазонаш тӏа кийчо яра балхаш тӏехкхоачашдаьд, цхьаццанахьа инженерни коммуникацеш чуяьхкай, иштта хьалъе йолаяьй гӏишлош. Парк хьалъер - «Кавдоломит» ООО компани.
Цунца цхьана дӏахьош ба, цу даькъ тӏа къахьега раьза бола инвестораш тӏахьехаш бола болх. Цига лаьрхӏад доломтиа хьоар даккха, минеральни боамби, хоза кхера, наькъа такилгашка етташ йола плитка хьае. Из проект лоархӏаме я республикан экономиканна, иштта лоаман доазонаш дегӏадоаладара, керда балха моттигаш хьакхоллара», - аьлар республикан кулгалхочо Келаматанаькъан Махьмуд-Ӏаьлас.
Иштта ала деза ший промышленни даькъ тӏара хӏама йохкара хьакъехьарча республикан толамех. Цу тайпара, дӏадахача шера ГӏР промышленни производства таро хилар 109,2%, из бахьан долаш цо яьккхар СКФО шоллагӏа моттиг, хӏаьта РФ ялхлагӏа моттиг. Дӏаяхьийта продукци 18,3 млрд сома я.
Мехкадас белгалдир цу даькъ тӏа дукха толамаш даьха хилар; уж кхы а дукхагӏа хургхиларах тешаш ва из. Цо хьаелл мехка «Жӏайрахь» яха проект, иштта кхыдола дукха дика наькъаш.
Республикан лоаман даькъ тӏа технологически йоккхий майдаш хьакхоллаш хиларо таро лу бахархой вахара хьалаш тоаде, балха моттигаш ӏалашъе.
