Лоаман юртарча Даьхе лораеш лаьттачун берашта, деша кхухьа тӏормеш делар
Тӏема аренашка декхараш кхоачашдеш латтачар берий оагӏув хьаллацара духьа, «Цхьана кийчбергба тӏормиг» яха болам ба вай мехка дӏахьош. Бераш ишколе дахийта новкъостал дарах йолча цу проектага гӏолла тӏема аренашка де доацаш вайнача Хочубаранаькъан Назира берашта эшаш болча кхоачамах диза тӏормеш ийца ваха хилар Лаьжгерча культуран Цӏен кулгалхо, иштта Жӏайрахьа кхале Даьхен лорабой дезалий Комитета штаба хьалха латта Хутенаькъан Ӏамархан.
Бӏухочун берашца Сафияйца, Айшайца, Мухьаммад-Фатихьаца къамаьл даь, ишколе эшаргйолча хӏамаех диза дола тӏормеш дӏаделар цар. Де доацаш тӏема моттигашка вайнача бӏухочун цӏагӏарча наха белгалдечох, тахан иштта оагӏув хьаллацар чӏоагӏа лоархӏаме, гӏо хулаш да царна, хӏана аьлча бер ишколе даха кийчдеш эца дезараш дукха хул. Хӏаьта да тӏавоацаш бисачар вахаре геттара хоалуш хул из. Даьхен лорабой дезалий моттигерча Комитете цу оагӏонцара болх дикка дӏабахьа лерхӏаш ба.
Лоаман юрташка дахача Даьхе лорае арабаьннарий берашта терко еш, дешара шу долалуча дийнахьа цу цӏайца дог ловзаш уж хургдолаш, керда тӏормеш дӏадекъара болх дӏахьош хургба гӏо деш лелараш, хьинардараш. Къаьстта цу берашта ма могга терко яр лоархӏамеча декхарех да тахан.
