Кхалнаьха пӏелгах боаллабу къаьнара гӏоз корабир гӏалай юртара
Гӏалай юрта болх дӏахьош боахкача археологашта къаьнара, вай кхалнаха лелабаь дото гӏоз корабир. Из хоам «Сердалога» бир «Тӏехьале» яхача тӏоговзанчий ишколе.
Гирети яхача юртарча № 3 йолча малхарча кашара корабир гӏоз.
Дикка хьежача белгалдир, из къонача йоӏа лелабаьлга. Гӏоз беха ба. Юкъе жовхьара (янтара) кӏиг латташ ба из. Янтарь Прибалтике, шийлача форда юхера хьабоаккха кхера санна чӏоагӏбенна боалоз ба, иззал никъ баь Гӏалгӏайчен лоаме из мишта кхаьчаб уйла е езаш хӏама да. Бакъда Лохера Пхьуй яхача моттига, Ахабоарзен берда йистегӏолла Цӏихезача даьре наькъа такилг хиннад. Цига гӏолла кираша кхихьад кӏадаш, пхьегӏаш, наггахьа мара нийслуш доаца кӏигаш. Археологаша белгалдечох е ийца, е совгӏата денна нийсденна хила мег янтарь лоаман юрта.
«Тӏехьале» яхача ишкола доакъашхоша белгалдечох, цу хана еха, телха йола цхьацца хӏчамаш лаьрххӏа дийнабарий дуненцара къоастайий веннача сагаца ӏочуйохкаш хиннай, бакъда из гӏоз иштта ӏобиллаб аьнна хеташ бац тохкамхой.
