Лоаман Гӏалгӏайчене гӏолла экологически экскурси йир Даьлийтӏе элгац долча
Гӏалгӏайчен лоамашкарча ӏалама хозача даькъ тӏа вӏашагӏъеллар экологически экскурси, къаьнара элгац Даьлийтӏе долча баха. Цун доакъашхой хилар элгаца кӏалхарча ламаза гув оалача моттиге. Экспедице керттера маӏан дар, республикан лоархӏам бола культуран-исторически тӏехьале, тамашийна ший белгало йола, къаьнарча езача моттигашта го баь латта тамашийна ӏалам довзар.
«Экскурси яр «ООПТ-ӏилман-волонтёрий кхаь тайпарча бувзамий кепаш» яхача проекта чуйоагӏаш, из кхоачашъеш я Президента ӏалама ганзо хьаллоацаш. Цу проекто кхоачашду лоархӏаме гӏулакх - цо вӏашагӏтох хьинар дола ӏилманхой, лаьрххӏа ӏалама доазув (ООПТ) лорадеча даькъ тӏара говзанчаш, иштта из хьал бе-башха доаца нах; цун цхьа маӏан да, пайда а луш, ӏалама мах бараш, мехка культуран тӏехьале лораяр. Цу тайпара кхетаче дӏахьош хиларах, доакъашхошта кердадараш довзаш хиларал совгӏа, цар лоархӏаме декхар кхоачашду гонахьара хьал, къаьнара сийленгаш лорадеш», - аьлар «Сердало» газетага Гӏалгӏайчен кагирхой Комитете.
Чоалхане, бакъда хоза никъ дӏабахьарах, экскурси еш барий шоашта бӏаргаго таро хилар мел хоза я лоаман Гӏалгӏайче. Хӏара Даьлийтӏе яхача элгаца тӏаводаш боаккхаш бола гӏа хьалхадоаккхаш бар, мел лоархӏаме да из доазув, цун культуран тӏехьален гӏишлош лораяр.
