Илдарха-ГӀалий тӀа керда ФОК хьалъе лерхӀ
Таханарча ханага хьежжа йола ФОК хьалъе лерхӀ Илдарха-ГӀалий тӀа. Цу чу хургба боккха бассейн. «Спорт - вахарера оамал» яхача къаман проектага гӀолла дӀахьоргба из лоархӀаме болх. ЖБИ кхален чухьа доазув къоастадаьд ФОКа. Бахархошта, спорта оагӀонцарча доакъашхошта хетар, дезар керте лоацаш, хержар моттиг.
«1,5 га кхоачаш доазув да цу моттиго дӀалоацаргдар. Проектно-ахчан оагӀонцарча балхах дола каьхаташ, кхыдараш федеральни оагӀонна дӀатӀадахьийтад, къаман проектага гӀолла спорта лаьрхӀа керда гӀишло хьалъе пурам луш ахча хьахьожадергдолаш. Тахан болх беш йола ФОК зӀамига я, цунга хьежжа ма хетта дӀадодац цу чу спортсмений гӀулакх», - дийцар «Сердалога» шахьарерча администраце.
Шахьарерча хьакимаша белгалдечох, кердача ФОКо спорта оагӀонцарча вахаре дукха хӀама дикача оагӀорахьа хувцаргда. МоллагӀча ханага кхаьчача наха ха дӀаяхьа аьттув луш моттиг хургья из. Теша лов, цу чура керда чемпионаш арабаргхиларах, спортацара бувзам чӀоагӀбе ловраш шахьаре дукхагӀа хургхиларах.
