Гӏалгӏайчен Госдрамтеатре болх беш ба, «Насредина дошо вир» яха спектакль кийчъеш
Гӏалгӏай паччахьалкхен Боазаркъанаькъан Идриса цӏерагӏча драматически театре «кхехкаш» ба кхоллама болх. Укхаза селий драматурга Казиев Шапе «Насредина дошо вир» яха фаьлг кийчбеш ба. Цига гойтар гӏалгӏай меттала дувцаш хургда, хьожачарна еррига къаман белгалонаш цига хоалуш хургья. Спектакла режиссёр-оттаяьр ва Гӏалгӏайчен халкъа артист Галай Мурад.
«Сюжета керте латт - говзача Ходжа Насредиа истори, из хила деза, Насредина шийна хержа йоӏ Фатима маьре йига гӏертача кулгалхочунна духьале еш. Турпалхочун хьалхашка латта декхар да, из цӏаьрмата хьаким ӏеха а ваь, хоза йоӏ шийна ца везача сагах кӏалхаръяккхар. Насредина керттера говзал цун вир да. Кӏоарга хьаькъал а, коммерчески говзал а йолаш хиларах, цо вӏаьхийча Хана гонахьарбараш тешабу, ший вир мах бола ганз лелаеш хиларах. Из ба цӏаьрматал, хьагӏ, яькха хилар гойташ бола белам. Цо хьожачарна гойт, дика массаза а вочул котдоалаш хилар», - аьлар «Сердало» газетага Гӏалгӏайчен Паччахьалкхен драматически театре.
«Насредина дошо вир» яха спектакль берашта хьакхеллай, из чуйоагӏаш я Гӏалгӏай госдрамтеатра гастролашка хьоча балхашта; республикан ишколашка, культуран моттигашка из гойтаргья. Из го таро хургья Гӏалгӏайчен эггара гаьнагӏа йолча юрташка а.
