Мехкарча суртанчий Паччахьалкхен музее Ахтоланаькъан Аминай гойтам хьабийллар
«Амина лакха начӏал долаш саг я. Шийна гонахьара ӏалам довзийта ца ӏеш, ма ярра цун кӏоаргал, хозал сурташка гойта аьттув боал цун. Гуш да, ший къаман хӏама, мехкара ӏалама хозал, гӏалаш, лоамаш цун дега боча, гарга долга», - дийцар «Сердалога» культуран гӏулакхех йолча министерствон хьалха латтача Лаьнанаькъан Залинас.
Гойтаме баьхкабар СВО доакъашхой, ветеранаш, цӏихеза суртанчаш. Аминай хьалхара гойтам кхоллама новкъа шерра баьккха гӏа болга белгалдир боккхача суртанчаша. Цу дийнахьа цига хьокха оттабаьбар къонача суртанчан 40 болх.
Къаьстта чӏоагӏа беркате хеталора Даьхен ӏалама моттигаш йовзийташ дола сурташ. Дегаца, сица даь балхаш да ала йиш яр царех! Ахтоланаькъан Аминас доккха баркал аьлар ший оагӏув хьаллаца, ше кхелла сурташ довза цига гулбенна мел хиннарашта. Дӏахо а хьинаре къахьега лаьрхӏа я из.
