Гӏалгӏайчен ИЗО Паччахьалкхен музее хьабийллар «Пхи дошо седкъа» яха гойтам
Гӏалгӏай Паччахьалкхен исбахьален искусствай музее тахан хьабийллар «Пхи дошо седкъа» яха гойтам. Из хетабаь ба Российски Федераце Турпалхошта - Гӏалгӏайчен бахархошта, шоай тӏема декхар кхоачашдеш лаьрххӏача тӏема операце даькъ тӏа денал гойтарах лакхара паччахьалкхен совгӏаташ деннарашта. Гойтама чуйоагӏаш я суртий галерея, цига я Хьоашаланаькъан Ювсапа Султана, Боканаькъан Къурейша Мустафай, Хьоашаланаькъан Адама Султана, Тӏумхой Руслана Хьасана, Хамхой Ярагӏе Адама цӏераш. Уж язъяьй дошоча алапашца, Россе кердача исторен оагӏон тӏа.
«Гойтам хьабийллар кӏимарса бетта 1-ча дийнахьа - из ди белгалдеш да ветераний юкъарлоно тӏема гӏулакхий Ди санна. Цудухьа цу дийнахьа баркал оал, шоай Даьхе бахьан са дӏадала кийча болаш латтача бӏухошта.
Уж сурташ даьр ва Россе суртанчий доакъашхо, Гӏалгӏайчен искусствай цӏихеза болхло Хоронько Игорь. Суртанчанна дика карагӏдаьннад сурташ ма дарра хьакхолла; цул совгӏа, цо ший балха говзалга гӏолла гойт вай бӏухой чӏоагӏа, денал дола оамал», - аьлар «Сердало» газетага Гӏалгӏайчен ИЗО Паччахьалкхен музее
«Пхи дошо седкъа» яха гойтам хьагойташ ба лоархӏаме культуран, юкъарлон проект. Из проект лаьрхӏа я исторически дагалоаттам лорабара, Даьхенцара безам совбаккхара, иштта Даьхен бӏухошцара лерхӏам лелабара.
