ИЗО музее Мартазанаькъан Мусай лаьрххӀа бола гойтам хьабелларгба
ГӏалгӀайчен Паччахьалкхен исбахьален искусствай музее кийчлуш ба, республикан халкъа суртанчан Мартазанаькъан Мусай «Суртанча, поэт, вахархо» яха лаьрххӀа бола гойтам хьабелла. Цо гойт таханарча заман исбахьален мах бараш, иштта цига дикагӀа вовза йиш я хьамсарча мехкаца бувзабеннача кхоллама говзанча. Цига гойтаргда Яхььяй Мусас хьакхелла дукхача оагӀорахьара балхаш, цун начӀал: кулгаговзала балхаш, Ӏалама хозал, цар мах бараш.
«Мартазанаькъан Муса - ше Ӏомавенна говзанча ва, цун кхоллам вӏашагӏъийна ба исбахьален искусствон оагӀонца, поэта уйланца, кӀоаргача граждански вахарца. Цун кхоллам хьалбизаб философе маӀанах, дина мах барех, къаман Ӏадатех, цо хьагойт автора дег чура уйлаш, цун хьамсарча лаьттанцара бувзам. Гойтаме го йиш хургья 40 гаргга сурт, иштта тайп-тайпарча оагӀорахьара исбахьалени, дин оагӀонаш гойташ дола ДПИ», - аьлар «Сердало» газетага ИЗО Паччахьалкхен музея зарбан болх лелабераша.
Мартазанаькъан Яхььяьй Муса ца хилча йиш яцар ГӏалгӀайчен культуран вахаре. Цун кхоллам - из Ӏадат а кердадараш а да, цун хӀара мугӀ хьагойташ ба дукхача бӀаьшерий исторен оагӀонаш, цунца цхьана таханара вахар.
Суртанча хинна ца Ӏеш, поэт волча Мусас хьакхолл тамашийна кхоллама болх, цу тӀа го йиш я сурт хиларал совгӀа, деша говзал а, шоайла уж дувзаденна хилар а, бӀарчча исбахьален дуне вӀашагӀдоллаш. Дӏахьоргболча гойтаме таро хургья, къаман культура дегӀайоалаеча цо дакъа лоацаш хилара мах оттабе.
