ГӏалгӀайчен Паччахьалкхен музее, керда шу тӏадоагӏаш, говзанча-хьехам хилар
ГӏалгӀайчен Паччахьалкхен гойтама зале дӀабихьар «Корсама ловзоргаш тӀа йоазув дар» яха говзанча-хьехам, цун берригача доакъашхошта гаргагӀерташ долча цӀайна дегаондо луш бар из, иштта цар таро хилар къаман кулгаговзала искусство йовза. Кхетаче гулбелар Шолжерча №5 йолча юкъерча дешара ишкола къона хьаьший. Цар гойтар шоай хьинарца, говзалца зӀамига, тамашийна хозаленаш.
«Галерея кулгалхочо Котанаькъан Салимас кулгал деш, берий таро хилар шоай кулгашца кердача шера лаьрхӀа йола корсам кечъе. Уж чӀоагӀа раьза хилар из болх бе, хӀара лоадам боацар а тӀехьа зувш. Цар хьакхоллаш хинна хозал ший тайпара яр, хӀаьта говзанча-хьехамаш чакхдоалаш, массане а таро хилар шоай кулгашца хьакхелла хозаленаш чуяхьа, цунца цхьана кердача шерара дика уйлаш а», - аьлар «Сердало» газетага из болх вӀашагӀбеллараша.
Болх дӀахьош, корсама ловзоргаш хоза хеташ, шоайла белаш, берий дег чура гӀадбаха хилар хьахозаш дар, хӀаьта къонача суртанчий бӀаргаш делаш дар шоай хьалхара кхоллама толамаш хиларах доккхал деш. Говзанча-хьехамо берий безам совбаьккхар, къаман исбахьален кулгаговзалцара.
