Гӏалгӏайчен Паччахьалкхен искусствай колледже дийшарашта дипломаш дӏаделар
Гӏалгӏайчен Паччахьалкхен искусствай колледже лаьрххӏа йола кхетаче хилар, дийша баьннарашта дипломаш дӏалуш. Из лоархӏаме гӏулакх дар къонача говзанчий вахаре, шоай хьамсарча дешара моттиге дукхача шерашка дийша баьнна хилара белгало яр из. Тӏехьашка йисар, бӏаьш сахьаташ доахаш, дӏахьош хинна репитицеш, экзаменашта кийчо еш наб йоаяь бийсаш, саготдаь денош. Селхан студенташ хиннараш хӏанз дипломаш дола ашархой, иллиалархой, халхарчаш ба, уж кийча ба профессиональни сценаш, культуран майдаш цецъяха.
«Зале сатем а цунца цхьана шоайла къасташ хиларах гӏайгӏа а яр. Цар никъ дика бувцаш дола дешаш аьлар колледжа кулгалхоша, хьехархоша. Цар белгалдир, цу дешара моттиге хӏара курс ший истори долаш хилар, цар ловца баьккхар кагирхошта, шоай низ дӏакхачарах тешаш хила а аьлар, майрра искусствон никъ дӏабахьар дӏахо шоана тӏа да, аьнна, белгалдир», - аьлар «Сердало» газетага искусствай колледже.
Дийша баьннараша баркал аьлар хьехархошта; хьаькъал, кхетам шоашта баларах, из бахьан долаш колледж шоай шоллагӏа дола цӏа санна хилар царна. Къонача говзанчашта хьалха керда кхоллама никъ ба, профессиональни тӏахьехам ба, иштта сийрда толамаш да.
