Гӏалгӏай къаьнара къахьегам дийнбеш хилар Инаркъе
Къаман культураца, истореца дувзаденнараш дӏацадалийтар, къонача тӏехьенга дӏакхачийтар лоархӏаме да тахан. Къаьнара, тхьоврача хана баьхача вай къаман кхалнаха фертах хьадеш хинна кӏувсаш-истингаш мишта малхадоалаш хиннад гойтар юртарча культуран Цӏагӏа. «Тӏехьенгара тӏехьенга кхоачаш, хьадоагӏаш дола из беркате гӏулакх довза аьттув бар кхувш латтача йиӏигий. Истинг яхар духхьал цӏагӏа лелаю хӏама хинна ӏац, цун къаьнарча гӏарчожца дах къаман истори, культура, философи, ӏадаташ», - йоах «Сердалога» бенача хоамо.
Кулгаговзалах йолча кружока хьалхалаттача Ӏахьилганаькъан Райшата йиӏигашта йовзийтар цу балхацара кӏоаргаленаш. Юххьанца тха оалхаш, кийчдеш, гӏарчожца, догамца кӏувс тоабеш болча балхах дийцар цо. Кӏувс хьакхоллара болх мишта хила беза дӏахьекхар. Чӏоагӏа раьза болаш, хьожаш бар гулбеннараш, говзача кулгашка «ловзача» тхах къаман къаьнарча гӏарчожца тоабаь бола кӏувс мишта хьахул.
Цу кхетаче лоархӏаме хьаьший болаш дакъа лоацаш бар Магӏалбика кхален депутатий оагӏон кулгалхо, «Цаӏ йолча Россе» моттигерча оагӏон секретарь Гӏулой Къурейш. Цо белгалдир, цу тайпара болх вай къаман истори, культура лораяра тӏехьа лоархӏаме болга. Ишттача кхетаченашка къонабараша дукха хӏама ӏомаду. Къаман селханарча вахарца дувзаденнараш довзар царна пайда беш хургда.
