Цӏихеза байтанча Вешкаранаькъан Мухьмад дагалаьцар тахан ИнгГУ
Къаман байтанча хиннача Вешкаранаькъан Мухьмада кхоллама, вахара наькъах дувца гулбелар тахан гӏалгӏай паччахьалкхен университете. Цигарча филологически факультета хьехархой, студенташ бар цӏихезача байтанча цӏи дийнъеш къамаьл даьраш.
«Вешкаранаькъан Мухьмада байташ ешаш, иштта къаман, российски литературе цо йитача ларах дувцаш ха дӏайихьар гулбеннараша. Кхетаче баьхкабар байтанча гаргара нах. Доккха баркал аьлар цар вуза кулгалхошта, тахан шоай саг дагалацарах, къонача тӏехьенна цун кхоллама никъ бовзийтарах», - дийцар «Сердалога» университета зарбан болх лелабераша.
1955-ча шера оагӏой бетта 23-ча дийнахьа ваьвар Вешкаранаькъан Султана Мухьмад. Ваха висаваларе, тахан 70 шу дузаш хургвар воккха байтанча. Вай къаман культуре, литературе сийрда лар йита саг ва из. Вай къаман литературан оагӏонца лоархӏаме кхоане хинна дӏаэттад цун байтий гулламаш – «Эздел» (1982), «Бочал» (1987), «Назам» (1990), «Маьлха гӏалгӏай» (2001), «Лаьттан лоткъам» (2004), иштта кхыдараш а. Гӏалгӏай мотт мел кӏоарга, кӏаьда, бӏаьхий ба ха йиш я; цун байташ ешаш. Ше мел яздер, дег чура яздеш ваьхав из дӏаьхий дог дола, метта кӏоаргал, деша хозал йовзаш хинна байтанча.
