Боккха тийшаболх кхостабар тӏатетташ да вай мехкарча адвоката
Адвокат юкъе волаш, кхостабаьча тийшача балха ларах тохкам дӏахьош ба мехкарча СКР викалаш (РФ УК 4-ча даькъа 159 ст.). Наьсарерча тохкама оагӏон болхлой ба из гӏулакх дӏахьораш.
«Тохкама болхлоша тахан белгалдечох, 2024-ча шера лайчилла бетта, мехкарча вахархочунгара 2,5 миллион сом ахча хьаийцад адвоката; набахтенах цун воӏ кӏалхараваккха гӏо дергда ше, аьнна. Бакъда ахча дӏаийцар из гӏулакх де аьттув болаш хиннавац юххьанца цхьаккха тайпара. Ше дергда аьннар кхоачашде вӏаштӏехьадаьннадац, хӏаьта хьаийца ахча ший дега ма хетта дехкад. РФ УПК 91- 92 ст. дӏалаьцав из ӏаьдало. Ара висача из саг къайлавала гӏортар теркаме лаьца, дӏа ца хецаш витар из судо. Карарча хана из гӏулакх ма дарра тохкаш болх дӏахьош да ӏаьдал», - йоах «Сердалога» тахан мехкарча Тохкама оагӏон болхлошкара кхаьчача хоамо.
Наьсарера тохкамхой юххьанца денз ца ховш, гучадаланза диса хӏама дий хьожаш къахьегаш ба. Дукха ца говш судо къоастадергда цун гӏулакх. Мехкарча ФСБ оагӏон болхлошка гӏолла, аьттув баьлар зуламхо хьалаха. Чекисташа гулдаьрашка гӏолла хьадийлла да тахан из гӏулакх.
