Гӏалгӏай мехка лаьцар, къайлагӏа лелабу болхлой ӏехабаь бизнесмен
Гӏалгай мехкарча ший мебель еча фабрике къайлагӏа болхлой лелабеш вола бизнесмен хьа а лаьца, набахта чувеллар, яхаш, дийцар «Сердало» газетага ГӏР бокъонаш лораяра боахаме.
ГӏР гӏолла миграце хаттарех йолча МВД Урхаллен болхлоша, Россе моттигерча УФСБ болхлошца цхьана гучадаьккхар, Тӏой-Юрта мебель еш волча бизнесмена бокъонах доацаш кхыча мехкарча нахага шийна къайлагӏа болх байташ хилар.
«Ховш болча хоамах, предприяте кулгалхочо гаьнарча мехкара 8 саг шийна къайлагӏа болх байташ лелаваьв. 2024 шера, тов бетта уж нах мебель гулъеш хиннаб, иштта цига бахаш а хиннаб. Бакъда из болх дӏабахьара, иштта Россе доазон тӏа уж ӏеш хилара йола бокъо царга хиннаяц. Гучадаьлар, зуламхочо уж нах кхы а шоай мехка болча хана ӏехабаьб. Цо царна тешал даьд, Абазой Республике, бетта США эзар доллар долаш, царна болх лохаргба, аьнна. Цар никъ хиннаб Российски Федераце гӏолла бахьа безаш. Бакъда Москве хьакхаьчачул тӏехьагӏа, питам болча предприниматела зӏамигача автобусаца уж хьабоалабаьб Гӏалгӏайче», - йоах МВД хоамо.
Гӏалгӏайче хьакхаьчачул тӏехьагӏа, цо царгара паспорташ хьадаьхад, уж кхы баха моттиг йолаш хиннабац цун доалахьарча моттиге болх бе ца ӏийча. Цо царна луш дола ахча дуккха кӏезигӏа хиннад хьалха дийцачул: болхлошта 20 эзар сом луш хиннад бетта. Цох 12 эзар сом цар дезалашта дӏадохьийташ хиннад, юхедисар - бе дӏалуш. Мигранташ мехка чубаьнна дукха ӏе бокъо йолаш а хиннабац (3-7 ди), из ха чакхъяьнна дукха ха я.
Бизнесмена духьала хьадийллад уголовни гӏулакх, из хӏанз лаьца чувоалл.
Тохкама болхлоша цо даьча зулама боагӏаш бола мах оттабу, наьха кортамукъале йийхка, уж шийна чуоттабаь хилар дӏа а лоархӏаш. Хӏаьта кхыча мехкара баьхкача нахага диллача, уж шоай мехка дӏабахийтара болх вӏашагӏболлаш ба, законо дӏадеххача беса.
