Пхи бер долча 10, 6 эзар ноаношта, пенси лакхдаьд вай мехка
Пхиъ е дукхагӏа бераш долча вай мехкарча 10, 6 эзар совгӏа ноаношта укх шера пенси лакхдаьд. Из хоам «Сердалога» бир пенсех йолча Россе ганза оагӏон болхлоша.
«Тахан хьаяьннача бокъонга хьежжа; пхе берага, дукхагӏа берашка цар цхьа шуи ах шуи даллалца хьожаш йола ха ноаной стажа юкъегӏоргья. Хӏанзолца диъ берага хьожаш хинна ха мара яцар стажа юкъейодаш, из а ялх шерал дукхагӏа хила йиш йоацаш.
Керда бокъо аьттув луш я 2026-ча шера пенсе болхарашта санна, ӏаьдалгара берашта ахча ийдерашта а. Берашка хьожаш йолча хана кхалсаг къахьегаш хуле; дӏахо, пенси хьожадеча хана, цун аьттув болашагӏдар къоастаду: болх беш хиннача ханацара ИПК е берашка хьожаш хиннача ханацара.
«Дукха бераш долча ноаношта чӏоагӏа дика хӏама да из. Берага хьожаш мел хинна ха стажа юкъе яхийтарал совгӏа «пенсионни коэффиценташ» (ИПК) дӏалоархӏ царна стажа юкъе: хьалхарча бера 1,8 ИПК дӏалоархӏе, шоллагӏча бера – 3,6; кхоалагӏча, дӏахорча берашта 5,4 ИПК, хӏара берага хьожаш хиннача цхьан шерах», - дийцар тхога мехкарча СФР оагӏон хьалха латтача Йовлой Зубейра.
