Кхерамзлен хьалаца дувзаденнараш лорацадарах, бехктокхаме озаргва водоканала болхло
Суда хьалхашка жоп дала дезаргда водоканала болхлочун. Кхерамзленца дувзаденнарашта боаггӏача боараме цо терко цаярах, саг лозавеш хатар хиннад. Из гӏулакх тохкаш болх дӏабихьаб СКР Магӏалбикерча тохкама оагӏон болхлоша. РФ УК 1-ча даькъа 216 ст. бехктокхаме озаш ва из ӏаьдало.
«2026-ча шера маьтсела бетта, Магӏалбике хатар хиннача моттиге болх дӏахьош, кхерамзленца дувзаденнарашта тӏахьожам, терко е ше оттавича, болх дӏахьош хиннача моттигаца бартчӏоагӏо оттаяь, кхерамедараш довзаш воаца саг болх бе тӏавитав цо. Болх дӏахьош боахкача хана, лакхера лаьтта ӏочухаьрца, из саг дегӏа доккха айп деш лозаваьв», - йоах «Сердалога» мехкарча Тохкама оагӏон болхлошкара бенача хоамо. Гӏишлон балхаш дӏахьоча моттиге лораде дезараш цу сага теркалцадарах бехке веш ва из тахан. Карарча хана суде дӏахо тохкаш латт из гӏулакх.
