Гӏалгӏайче безбир моттигерча дешара даькъ тӏара болхлой
Шолжа-Шахьара культуран Цӏагӏа лаьрххӏа йола кхетаче дӏайихьар, из хетаяь яр хьехархочун балха цӏайна. Лаьрххӏа дола цӏай дакъа хьадийллар Гӏалгӏайчен кулгалхочо Келаматанаькъан Махьмуд-ӏаьлас, цо ше паччахьалкхен совгӏаташ делар, иштта белгалдир хӏара сага вахаре хьехамчаш дӏалоацаш дола дакъа лоархӏаме хилар. Цо яхачох, къаьстта хьехархо ишкола вахара юкъе ва, цо новкъостал ду берашта начӏал хьаделла, халонаш тӏехьайита, шийна хьалхашка латта декхараш кхоачашде.
Цига дӏахо къамаьл дир дешара министра Цхьорой Ахьмад-Башира. Цо баркал аьлар гулбеннарашта цар хӏара дийнахьа дӏахьоча атта боацача балхах, уж шоай профессена мутӏахьа болаш дӏаболхаш хиларах.
Из цӏай царца декъа баьхкабар Гӏалгӏайчен Паччахьалкхен кулгалхочун гӏонча Мутаӏаланаькъан Хьажбийкар, Халкъа Гуллама вице-спикер Хьаьшанаькъан Аза, тайп-тайпарча дешара боахамий даькъ тӏа болх беш бола ветеранаш.
Таханарча денга кхоачаш, Гӏалгӏайчен дешара экономически даькъ тӏа дика къахьегаш ва 6 эзар совгӏа говзанча. 2019 шера денз, мехка юкъейоалаяьй 49 вай заман ишкол, 25 эзар дешара моттиг йолаш, иштта 50 берий беш, цига да 10 эзар бер. Овлангара хийца, тоаяь яьлар 44 ишкол, ялх берий беш, цхьа колледж.
Цу дерригане чаккхе я кхувш йоагӏача тӏехьено доахаш дола толамаш. Гӏалгӏайчен хьехархой говзал лакха хилар хьагойт 2026 шера ЕГЭ дӏалуш 24 выпускника 100 балл яккхаро.
Къаьстта баркал аьлар цу сцена тӏара хьехархошта - къахьегама ветеранашта, цар итташ шераш дӏаделар ишкола, тахан а къонача хьехархошца шоай балха говзал екъаш, дӏахо болх дӏахьош, ба уж.
