Гӏишлош еча къахьегараш белгалбир мехка
Гӏишлонхой Ди хьатӏакхачарца, цу оагӏонца къахьегачар кхетаче ваха хилар премьер-министр вола Сластенин Владимир. Укх шера къаьстта лоархӏам болаш да из цӏай, хӏана аьлча хӏанз 70-гӏа шоай Ди дездеш ба российски гӏишлонхой. Вай мехкадаьгара Келаматанаькъан Махьмуд-ӏаьлагара каьхат дийшар гулбеннарашта Сластенин Владимира.
Республикан Кулгалхочо ший къамаьлаца белгалдир, гӏишлонхой мехка кхоане сийрда, беркате хилийтара тӏехьа къахьегаш нах болга. Тахан хьалъеш латта керда ишколаш, дарбанчеш, наькъаш – из деррига вай къаман наьха вахар аттача доаккхаш, паргӏато йоаржаеш да. Лоархӏаме, боккха болх ба тахан оаш дӏахьор. Шоай декхараш бехктокхаме кхоачашдеш, оашош хьаийцача гӏулакхаца лерхӏам болаш, наьха вахара хьал аттачахьа даккха гӏерташ, къахьегарах баркал хилда шоана! Къаьстта хоастабе боагӏа ветеранаш, цу оагӏонцарча балха хӏама юххьанца чӏоагӏдеш лаьттараш уж ба», - аьлар Сластенин Владимира.
Дукхача шерашка лакхача боараме шоай гӏулакх дӏахьош хьабоагӏача, толашагӏа болча болхлошта Мехкадаьгара лерхӏама грамоташ елар цо. Паччахьалкхен совгӏаташца белгалбир дикача оагӏорахьара шоаш хьабовзийта гӏишлонхой. Гӏишлош хьалъяра болх тахан вай мехка дикка тоабенна ба ала йиш я. Мехка цу оагӏонцарча министерствон къахьегамца дукха лоархӏаме, къаман вахаре йоккха моттиг дӏалоацаш йола гӏишлош хьалъяьй тӏехьарча шерашка. Цу юъе я дешара моттигаш, берий бешамаш, дарбанчеш, культуран Цӏенош, спорта моттигаш, иштта йовзаргйоацаш хоза тоаяьй шахьараш, юрташ, доккхий хувцамаш деш.
