Саг верах бехкевечун гӏулакх суде кхаьчад
25.02.2026 13:39
Магӏалбика кхале вахаш волча саг вийнача мехкахочун духьала гӏулакх хьадийллад бокъонаш лораераша. Из хоам «Сердалога» бир мехкарча тохкама комитето.
«2025-ча шера оагӏой бетта Магӏалбика кхален Южни оалача юртарча цӏагӏа волаш, цхьан вахархочунца дов ийккха, чарахьал деш лелаю топ техай цо. Хиннача човнех лозавьр цу моттиге веннав. Из зулам къайладаккхар духьа, из саг ший машина тӏехьашкахьарча гӏанда тӏа дӏачувилла, Заьзгакъонгий-Юрта эрий ара ӏооттаяьй из машин», - йоах тхога ӏаьдалгара бенача хоамо.
Цул тӏехьагӏа къайлаваьннав из саг, бакъда цун ларах сихха болх дӏабихьача ӏаьдала болхлоша Краснодарера хьалаьцар из. Лоткъам эцача хана, из хӏама даьр ше ва аьнна дари дир цо. Суде тохкаш латт из гӏулакх дӏахо.
