ООО керттерча директора гӏулакх суде кхаьчад, йоала болхлоех ахча къайлакхахьарах
Гӏалгӏайче гӏолла йолча Россе СК Илдарха-Гӏалан тохкама болхлоша чакхдаьккхар мах беча моттига кулгалхочунна духьалара уголовни гӏулакх. Цун бехк хилар чӏоагӏду РФ УК 1 даькъа 199.2 статьяс, йоалах дукха ахча къайла даккхарца ювзаенна я из.
«Тохкамхочо яхачох, 2025 шера лайчилла беттагара 2026 шера бекарга беттага кхаччалца йоал дӏаяла езарах, страховой взносах дола декхар шийна ховшшехь а, дӏа ца луш, шоайла бувзам лелабеча моттигашта кредиторий чота тӏа ахча дӏатӏа а ухийташ, из кӏалхарвийннав предприяти декхарийла хилара хьал юстар а доахаш. Цу тайпара къайладихьад 6 000 000 сом совгӏа ахча, цу тӏара Российски Федераце бюджете дӏадала дезаш хинна декхар юха а сецадеш», - аьлар «Сердало» газетага Гӏалгӏайчен тохкама Комитете.
Лоткъам эцара болх дӏахьош, цу сага ший бехк тӏаийцар. Тохкама болх дӏахьош хиннараша, шоашка хьакхаьча, из бехкевеш дола тешал кхоачам болаш хиларах, из гӏулакх дӏадахьийтар суде дӏахо тахка.
