Пхиъ дешара моттиг цӏенхаштта тоаеш, болх даболабаьб мехка
«Цаӏ йолча Россе» къаман программага гӏолла тоаеш латт тахан мехкара пхиъ дешара моттиг. Цу юкъе я Магасера «Фаьлг» яха берий беш, Чахкенаькъан С. цӏерах йола Магӏалбикера № 1 йола гимнази, иштта Жӏайрахьара «Золушка», Гӏажарий-Юртара «Селаӏад», Магӏалбикера «Бӏы» яха берий бешамаш. Таханарча дийнахьа 65%-га кхоачаш кийча я уж моттигаш. Хьатӏабоагӏача бетта деррига балхаш чакхдаьнна хьаьший тӏаэца кийча хила езаш я еррига моттигаш.
«РФ Президента чӏоагӏонца йоаржаяьча программага гӏолла дӏахьош да уж хувцамаш. 2030-ча шерага кхаччалца дӏахьоргба из болх. Керда моттигаш тоаярал совгӏа, дукха шераш хьалха хьалъяь, таханарча денга кхоачаш бераш тӏаэцаш латтача моттигий хьал хувца, йоккха эргалонаш е аьттув луш программа я из. Цу программага гӏолла 41 ишкол, 2 берий беш я мехка тоаяьраш. Болх дӏахьоча моттигашка ухаш, деррига а боаггӏача боараме чакхдоаккхаш дий хьожаш, тӏахьожам лоаттабу аз. Дикка къахьегаш дӏабахьа безаш ба керда дешара моттигаш хьалъеш, кулг тоха дезача кхаьчараш тоаеш, хувцамаш деш бола болх», - язду ший Телеграм-оагӏон тӏа вай мехкадас Келаматанаькъан Махьмуд-ӏаьлас.
Белгалде деза, укх тӏехьарча шерашка республике 50 таханарча ханага хьежжа йола берий беш хьалъяьлга. Керда моттигаш хьаелларал совгӏа, деррига а боаггӏача боараме чакхдаьккха, берашта паргӏато хургйолча тайпара тоадаь хила деза. Кердача ишколашта, берий бешамашта тӏадолхаш дола наькъаш меттадоаладеш бола болх а цу проектаца цхьана дӏахьош ба тахан.
