Паччахьалкхен кагирхой театр тоадеш боахк тахан
03.02.2026 12:20
Гӏалгӏай паччахьалкхен кагирхой театра гӏишло тоаеш боахк болхлой. «Сердалога» из хоам бир Мехкадаь зарбан болх лелабераша.
«Из гӏишло тоае езача хьале кхаьча тоъал ха яр. Дӏадахача шера ахкан тӏеххьарча бетта дӏаболабир болх цу оагӏонцарча Россе Президента чӏоагӏонца йоаржаяьча федеральни проектага гӏолла», - белгалдир вай мехкадас Келаматанаькъан Махьмуд-ӏаьлас.
Карарча хана 30%-га кхоачаш болх чакхбаьккха баьннаб цига.
Кхоллама проектага гӏолла дикка тоалургда театра хӏама, дукха адам тӏалатташ йола, боаггӏача боараме паргӏата моттиг хургья цох.
