Гӏалгӏайче масса оагӏорахьара къоачашдеш да хица ӏалашо лоаттаяр
Магӏалбика кхален даькъ тӏа доаржадир хица ӏалашо лоаттаяра доккха балха дакъа. Карарча шера тоадеш латт 50 километр цун дӏоахал. Из моттиг кердаяккхара болх дӏаболабир кхален ворхӏ доал деча моттиге. Диъ даькъ тӏа къаьнара хин турбаш хийца яьннай, кхы а кхаь даькъ тӏа из болх чакхбоалаш ба. Из болх дӏахьош ба «Вахара хьалаш» яхача, Россе Президента Путин Владимира могаяьча къаман проектах.
«Аьккхий-Юрта хийцар 11 урам тӏа 7,2 километр турбаш, цига 14 хьажара гӏувнаш яьхар, 13 цӏера духьаларча низа гӏирсаш оттадир. Махьмад-Хитӏе кердаяьхар хий дӏахьожадеш йола турбаш, цо таро елар цахаддаш хий лоаттаде. Иштта балхаш чакхдоалаш латт Юкъерча Ачалкхе, Южне. Инаркъе уж балхаш даь даьннад 91%. 12 урамах, 8 урам тӏа турбаш хийцай. Хӏанз хий ийккха моттиг хуле а, из дӏакъовла таро хургйола гӏирсаш оттадеш латт. Болх чакхбаргба, лайчилла бетта 15-ча денга кхоачаш. Дола-Коа из болх йистебаьннаб 94%, Заька-Юрта-88%. Ворхӏ моттиг тоаярга дӏадодар да 246 миллион сом, - язду ший телеграм-оагӏон тӏа Гӏалгӏайчен кулгалхочо Келаматанаькъан Махьмуд-Ӏаьлас.
Магӏалбика кхале турбаш хувцара балхаш дӏахьош да, республикан керттерча хица наха ӏалашо яра хаттар кхоачашде дагахьа. Республикан Кулгалхочо яхачох, из хаттар цхьацца йолча моттигашка болх кердабаккхарца деррига кхоачаш хулаш дац. Цудухьа ӏаьдал хьожаш да нах бахача юрташкара ЖКХ объекташ керда а йоахаш, из хаттар массайолча оагӏорахьа чулоацаш болх дӏабахьа, цунца цхьана Эса хий чулацара йола лоархӏаме объект хьалъеш. Из гӏишло болх бе йолалургья 2029 шера, тӏаккха цахаддаш бахархошта хий лоаттаде таро хургья дукхагӏа долча Гӏалгӏай доазонаш тӏа.
Мехкадас белгалдир, керда хин гӏирсаш хьалдар цхьана дӏахьош да, къаьнара гӏирсаш кердадахарца - из цаӏ мара йоаца таро я, хин турбаш лелхара хьал юстар а доаккхаш, хина кхоачам лоаттабар.
Тӏеххьара цун чаккхе я - цӏена молаш дола хий наха лоаттадар, из хӏара цӏагӏа даим хьадоагӏаш хилар.
