Менна болаш, машин хехкаш лийннараш, суда хьалха жоп дала дезаш ба
Корта бохабеча маларах волаш, машина ко лацарах, шийна доагӏар дизза дӏаэцаргда Наьсарерча вахархочо. Из хоам «Сердалога» бера ӏаьдала болхлошкара.
«Наьсарен кхален прокуратуро гӏулакх хьадийллад 39 шу даьннача мехкахочунна духьала. РФ УК 1-ча даькъа 264.1 ст. бехктокхаме озаргва из ӏаьдало», - йоах тхога прокуратурера бенача хоамо.
МВД болхлоша хьаяхачох, 2021-ча шерарча ӏан хьалхарча бетта Дошлакъий-Юртарча наькъ тӏа ваьнна, лийннав из саг «ВАЗ 21140» машинаца, корта бохабеча маларах волаш. Белгалде деза, ишттача хьале волаш ӏаьдала из хьалхара хоавенна воацилга.
Дӏахойодача хана, машин лалла йиш йоацаш, бокъо йийхкаяр цун республикерча МВД ГИБДД ДПС болхлоша. Бакъда, цигара къайлаваьнна, ӏаьдала лохаш вар из. Наьсарен кхален судо дувцаргда цун дош.
