Боккхача дезала нанна пособи хьаэца бокъо елар
Гӏалгӏайчен боккхача дезала нана, ворхӏ бер кхоабаш ягӏа яхархо, яхар республикера сага бокъонех вола Викал волча. Цун бахьан дар берашта доагӏа ахча хьалуш цахилар, «Госуслугашка» гӏолла пхе бера доагӏа пособи хьадехаш дехар яздича а. Цунга аьннад, анкета тӏа гӏалаташ да; цул совгӏа дезале хьатӏабоагӏа пайда а лакха ба. Бакъда из ше цу гӏулакха раьза яцар. Цо дукхача хана денз деррига банкера чот дӏакъайла хилар гойташ дола каьхаташ чуделар.
«Лакхехьа дувцар нийса дий хара, Викало Россе Вахара ганзе хаттар дахьийтар. Цул тӏехьагӏа ховш хилар, дезала хьатӏабоагӏа пайда мел ба, цхьа бер деша дагӏаш йола ха къоастаярах бола хоам ца хиларах цун ахча юхасоцадаь лаьтталга. Каьхаташ нийса юха чуденначул тӏехьагӏа, СФР лаьрхӏар пособи хьадала, 2026 шера маьцхали бетта денз 2027 шера кӏимарса беттага кхаччалца оттабаьча боарам тӏара 100 процент долаш», - аьлар «Сердало» газетага ГӏР УПЧ хоамий даькъ тӏа.
Сага бокъонаш лораяра Викал оарцагӏваларах, дукхача берий наьна нийсхо яьккхар. Из ахча хьадоагӏаш хургда деррига а, из доккха новкъостал а да боккхача дезала.
