СВО доакъашхошца, МЧС болхлошца кхетаче дӏайихьар кагирхоша
«Турпалашцара къамаьл» яхача ерригача Россе проектага гӏолла Россе кагирхой Денна хетаяь кхетаче дӏайихьар вай мехка. Моллагӏа хӏама хьанийсделча, цхьаккха хӏаман уйла ца еш, Даьхен гӏулакха ураотта, оарцагӏбаха кийчабарашца къамаьл де аьттув хилар кагирхой цу дийнахьа. «Сердалога» из хоам бера кагирхой гӏулакхех йолча Комитета зарбан болх лелаберашкара.
Зале гулбеннарашта хьалхашка къамаьл деш хиннараш бар тӏема операце доакъашхой, МЧС болхлой, иштта гӏо деш лелараш. Денал, яхь хиларах дола истореш довзийтар цар цу дийнахьа къонабарашта, хӏаьта моллагӏа хатар ийккхача эггара хьалха оарцагӏболхараша шоаш дувцаш дола вахаре нийсденна хӏамаш дог ураоттадеш хул, иштта хилар-кх цу дийнахьа а.
«Берригаш цхьана гулбенна дӏахьош йолча кхетаченах дикка пайда боал кагирхошта. Турпалашка дала дукха хаттараш дар цар цу дийнахьа. Мехка накъавоалаш, гӏо эшача гӏо де кийча волаш ваха ловча сага оамалашка эггара лоархӏамегӏдараш малагӏаш да белгалдир турпалаша. Массане дог ураоттадеш кхетаче хилар цох», - дийцар кагирхой гӏулакхех йолча комитета хьалха латтача Пхьошанаькъан Зоврбика.
Хатар хиннача моттиге гӏо де ухаш хьабоагӏарашца каст-каста кхетаченаш дӏакхахьар къонача тӏехьенна дукха хӏама довзийташ, денал, яхь, майрал гучадаккхар мишта хила деза белгалдеш хул.
