Мехка лорхӏаме никъ тоабеш, болх дӏаболабаьб
«Эккажкъонгий-Юрт – Дошлакъий-Юрт» яха 8 000 метрага кхоача никъ тобеш болх дӏаболабаьб мехка. «Сердалога» из хоам бир мехкадаь зарбан болх лелабераша.
«Наькъашкара хьал тоадар лоархӏамеча гӏулакхех да. Укх бетта наькъий контрактаци чакхъяргья, Минавтодора ший болх дӏаболабергба. 60 км кхоачаш бола итт никъ ба укх шера тоабе лерхӏараш.
Россе Президента чӏоагӏонца йоаржаяьча вахарера моттигаш тоаярах йолча къаман проектага гӏолла дӏахьош ба из болх», - белгалдир вай Мехкадас Келаматанаькъан Махьмуд-ӏаьлас.
Цу наькъа хьал меттадоаладеш да «Гӏалгӏай Республикера машиний наькъаш тоадар» яхача паччахьалкхен программага гӏолла.
Асфальт ӏобуллаш, 2 000 метров совгӏа дӏоахал дола тротуар буллаш къахьегаш ба цига.
Керда лампаш егӏа, наькъашкара бокъонаш белгалъеш йола гӏармаш оттаяь, хин дӏааха турбаш яьхка, остановкаш яь, хувцамаш дергда цига. Наха, машинашта йоккха паргӏато еш гӏулакх хургда цох, беррига болх чакхбаьлча. Эккажкъонгий-Юрта, Дошлакъий-Юрта бахача наха дикка атто ергья цу беркатеча хувцамаша.
Ер шу чакхдоалаш йистебаккха лерхӏ беррига болх, бакъда йиллача ханал хьалхагӏа а кийча хила мегаш я уж моттигаш.
